Naturgy e a Asociación de Traballadores Autónomos de Castela e León asinaron un acordo para poñer a disposición dos afiliados desta federación unha ampla oferta de enerxía, servizos e solucións enerxéticas destinada a mellorar a eficiencia enerxética dos traballadores autónomos.
Mediante este acordo, Naturgy asesorará aos autónomos da comunidade en materia de subministración enerxética, confort, eficiencia enerxética, mobilidade e iluminación, poñendo á disposición dos socios ofertas específicas con descontos en gas, electricidade e servizos, tanto para os negocios dos traballadores autónomos coma para os seus fogares.
Ademais, orientará en solucións enerxéticas para mellorar a eficiencia coa tecnoloxía máis avanzada, facilitando a adquisición de vehículos propulsados a gas mediante bonos e descontos en combustible.
O acordo foi asinado hoxe en Valladolid por José Manuel Toral, delegado para Castela e León de Naturgy e Soraya Mayo, presidenta de ATA Castela e León.
José Manuel Toral recordou tras a firma que “este acordo é unha mostra do compromiso de Naturgy por ofrecer os seus produtos coas mellores condicións a un colectivo tan importante como os traballadores autónomos, apoiados sempre pola última tecnoloxía e os mellores servizos para contribuír á optimización da factura enerxética dos seus negocios e vehículos”.
Pola súa banda, Soraya Mayo asegurou que “un dos nosos retos é impulsar a economía e os empregos sostibles e respectuosos co medio ambiente na nosa comunidade. Co que iso implica para aproveitar un nicho de mercado por explotar, recortar en gastos de consumibles fixos e estimular o potencial das empresas para converterse en actores do cambio. Como a principal asociación de autónomos sabemos que os gastos fixos dos case 200.000 autónomos casteláns e leoneses en gas, luz ou combustible son o primeiro escollo que deben superar mes a mes, polo que convenios coma este nos dan a oportunidade de reducir preocupacións e ampliar a competitividade dos autónomos”.
Primeira empresa enerxética integrada de España
Naturgy, unha das compañías multinacionais líderes no sector do gas e a electricidade, conta con preto de 20 millóns de clientes en máis de 30 países.
A través de Naturgy, a empresa ofrécelles aos seus clientes solucións personalizadas co obxectivo de cubrir as súas necesidades enerxéticas, mellorando a súa competitividade a través da innovación, o compromiso coa eficiencia enerxética e a redución de emisións de gases de efecto invernadoiro.
En Castela e León, Naturgy conta con preto de 700.000 clientes de gas e electricidade, 206.000 de servizos de mantemento (Servigas e Servielectric) e máis de 600 clientes con contratos de xestión enerxética integral e solucións de iluminación eficiente.
Sobre ATA
A Federación Nacional de Asociacións de Traballadores Autónomos-ATA é actualmente a maior organización deste colectivo en España, cunha representatividade acreditada polo Ministerio de Emprego e Seguridade Social do 64% do total de autónomos. ATA ten presenza en todas as comunidades autónomas. O seu obxectivo é a defensa dos intereses dos traballadores por conta propia e conta cunha ampla gama de servizos para os seus socios. Integra máis de 300 organizacións sectoriais, que en conxunto representan máis de 440.000 autónomos.
