O director xeral de Enerxía e Minas da Xunta de Castela e León, Ricardo González Mantero, e o director xeral de NEDGIA Castilla y León, Juan Antonio Pazos Arranz, inauguraron esta mañá a primeira estación de carga de gas natural comprimido para uso interno en León co obxectivo de dar servizo ao primeiro vehículo híbrido de gas natural que adquiriu hai uns meses o Ente Regional de la Energía de Castela e León (EREN).
A gasineira, cunha capacidade de comprensión de gas natural de 2,8 m3/h e subministrada por NEDGIA Castilla y León, é de uso exclusivo para o EREN e está situada no aparcadoiro do edificio da entidade pública, na avda. de los Reyes Leoneses de León.
Para poñer en marcha a instalación, a compañía distribuidora realizou unha nova acometida que permite a subministración da estación de servizo para a recarga da frota a gas natural do EREN.
NEDGIA Castilla y León ten previsto subministrar proximamente novas gasineiras na comunidade, tras a sinatura de diferentes acordos para o desenvolvemento de estacións de servizo. Unha en León, que será a primeira estación pública de carga de GNC sobre a rede de distribución da compañía na comunidade, outra en Valladolid e está a traballar para poder subministrar unha terceira tamén en Burgos.
Actualmente a través da rede de NEDGIA en toda España, distribúense máis de 1.100 GW/h dos 2.600 GW/h de gas que se consume como combustible para vehículos.
Na comunidade, os concellos de Salamanca e Burgos apostan dende hai anos polo gas natural vehicular para as súas frotas urbanas de autobuses e camións de recollida de residuos (Salamanca), debido á achega do gas natural usado como combustible para a mellora da calidade ambiental urbana. Recentemente, ambos os dous consistorios incorporaron 11 novos autobuses de GNC ás súas frotas, e suman un total de 57 autobuses urbanos os que utilizan este combustible sustentable. Outros concellos da rexión están a desenvolver proxectos para a incorporación de vehículos de GNC nas súas contornas.
Unha aposta sustentable e económica
O gas natural vehicular (GNV) é hoxe unha alternativa real, eficiente, sustentable e económica aos combustibles tradicionais para o transporte, tanto particular, coma de mercadorías e lixeiro. Os 22 millóns de vehículos de gas natural no mundo (2017) demostran a súa viabilidade, xa que conxuga en equilibrio importantes vantaxes económicas e ambientais, a través da redución de emisións e dunha menor contaminación acústica.
O gas natural vehicular mellora a calidade do aire das cidades, consecuencia das súas nulas emisións de NO2 e de partículas sólidas PM10, principal causa de problemas respiratorios derivados da contaminación urbana. Ademais, evita un 30% das emisións de dióxido de carbono e non emite dióxido de xofre.
Respecto á contaminación acústica, os vehículos que funcionan con gas natural producen un 50% menos de ruído e vibracións que un diésel. Este factor ten especial relevancia nas frotas que realizan traballos nocturnos, como son os camións de recollida de lixos.
En 2017, as matriculacións de vehículos e camións propulsados por gas natural incrementáronse un 112% en España, o que afianza o uso deste combustible no noso país, que conta xa cunha frota de 8.700 vehículos, cun consumo medio de 2.682 GWh ao ano, segundo datos de GASNAM (Asociación Ibérica de Gas Natural para a Mobilidade).
Os vehículos que utilizan este combustible conseguen a etiqueta ECO da Dirección Xeral de Tráfico, o que lles permite beneficiarse de libre accesibilidade ao centro das cidades en períodos de restricións de acceso por episodios de alta contaminación, de incentivos fiscais e bonificacións en zonas de estacionamento regulado, entre outras vantaxes.
Ademais, a utilización de gas natural vehicular como carburante supón un importante aforro económico para os usuarios tanto na compra do vehículo coma no gasto de carburante. Encher un depósito de gas natural é un 50% máis barato que recargar gasolina e un 30% máis económico que o diésel.
Sobre NEDGIA Castilla y León
NEDGIA Castilla y León é a compañía distribuidora de gas natural do grupo Gas Natural Fenosa nesta comunidade, onde distribúe a máis de 440.000 puntos de subministración en preto de 120 municipios a través dunha rede de transporte e distribución que supera os 4.200 quilómetros. Grazas á compañía, máis de medio millón de vivendas, comercios e industrias teñen acceso ao gas natural para o seu consumo.