GAS NATURAL FENOSA realizará os próximos 21 e 22 de febreiro, mércores e xoves, a proba acústica das sirenas instaladas nas presas de Villagudín e San Cosmade. As sirenas serán audibles, entre as 9:00 e as 18:00 horas, nas proximidades das presas, nos municipios de Cerceda, Ordes e Tordoia (A Coruña). Xa que unicamente se trata dunha proba, a poboación non deberá realizar ningunha acción especial ao escoitala e poderá continuar normalmente coas súas actividades.
A compañía enerxética, xunto coa Dirección Xeral de Emerxencias e Interior da Xunta de Galicia e Augas de Galicia, está a acometer a implantación dos Plans de emerxencia nas presas que xestiona dentro das provincias da Coruña, Ourense e Pontevedra, en cumprimento co que se establece na Planificación de Protección Civil ante o risco de inundacións.
O obxectivo dos devanditos plans de emerxencia é o de incrementar as garantías de seguridade que xa de seu ofrecen as presas. Afectan a numerosos aspectos e establecen diversos procedementos para levar a cabo no suposto de que se produzan incidencias no normal funcionamento das instalacións. Dentro das medidas que establece o Plan de emerxencia, inclúese a instalación dunha rede de sirenas dentro da zona de influencia das presas, cuxo labor será o de alertar a poboación en caso necesario.
Estanse desenvolvendo actuacións semellantes en toda España e GAS NATURAL FENOSA xa ten implantados oito plans de emerxencia de presas plenamente operativos.