Máis de 35 voluntarios da Fundación Naturgy formarán alumnos de segundo e terceiro de educación secundaria no marco dun novo programa educativo, “Xestionando a miña enerxía”, que se puxo en marcha en colaboración coa Fundación Junior Achievement.
O obxectivo desta iniciativa é que os estudantes aprendan a xestionar os recursos naturais tomando decisións responsables, converténdose así en consumidores críticos, con capacidade para adoptar posturas que protexan a contorna.
Ao longo de catro sesións, a través do xogo, a reflexión e empregando a metodoloxía learning-by-doing (“aprender facendo”), máis de 400 alumnos de Madrid e Barcelona comprenderán a importancia de saber xestionar os recursos naturais e económicos, grazas á experiencia e coñecemento no sector da enerxía dos voluntarios da Fundación Naturgy.
Os alumnos analizarán de xeito individual e en grupo a necesidade de tomar decisións responsables sobre os seus propios gastos, facendo fincapé no seu gasto enerxético, a necesidade do aforro e o consumo responsable. Así mesmo, grazas aos materiais elaborados ad hoc para o programa, reflexionarán sobre as repercusións que teñen os nosos actos no medio ambiente.
Entre as actividades que realizarán, salienta un obradoiro de comprensión de facturas, para que os alumnos aprendan a planificar as súas finanzas a longo prazo, asumindo compromisos e converténdose así en consumidores informados e responsables. Tamén abordarán o bono social, e calcularán a cantidade de enerxía máxima que se necesita nun fogar segundo as circunstancias de cada familia.
A Fundación Naturgy e a súa vocación formativa
O programa “Xestionando a miña enerxía” forma parte do catálogo de propostas educativas e divulgativas coas que a Fundación Naturgy ten como obxectivo transmitir valores sobre o cambio de modelo enerxético, a preservación do medio ambiente e o consumo responsable da enerxía. Dende a súa posta en marcha en 2012, case 700.000 nenos e mozos participaron nestas iniciativas educativas dirixidas a escolares de todos os niveis, entre as que salientan os recursos educativos online e presenciais para a aula, o Programa de Aprendizaxe-Servizo (APS) ou as experiencias itinerantes.
A Fundación Naturgy, fundada en 1992 pola compañía enerxética, tamén desenvolve programas de acción social, tanto no ámbito nacional como internacional, incidindo especialmente en actuacións destinadas a paliar a vulnerabilidade enerxética.
Sobre Junior Achievement
Junior Achievement é unha das organizacións internacionais sen ánimo de lucro máis grandes do mundo en educación emprendedora, educación financeira e orientación laboral. Desenvolve programas en máis de 120 países e en 30 idiomas, beneficiando a máis de 10 millóns e medio de mozos cada ano. Junior Achievement traballa en España dende o ano 2001 para potenciar o talento dos mozos e dotalos das habilidades necesarias para lograr unha exitosa transición á empregabilidade. Actualmente leva a cabo os seus programas en centros educativos públicos, concertados e privados grazas á colaboración de numerosas empresas e institucións. Durante o curso escolar 2017-2018, Junior Achievement España impartiu un total de 2.912 programas que beneficiaron a 35.614 alumnos de centros educativos de todas as comunidades autónomas, grazas á colaboración de máis de 2.600 voluntarios.